أبد مو چذاب

مشرف المشاركات : 297 تاريخ التسجيل : 06/02/2009

أبد مو چذاب

كلكم إتعرفون الحرب العالميه الثانيه تقريبا بالـ (1935).. آني چان بوكتها عمري 16سنه... المهم گاعد بالبيت دا العب بلي ستيشن 2.. دگ الموبايل مالتي (اي لا تتعجبون.. اني من ذاك الوكت عندي موبايل)

اي اكمللكم.. دگ الموبايل.. .. شلته.. طلع (رئيس الجمهوريه مال روسيا).. گلي: وليدي.. آسفين على الازعاج بس الوضعيه حيل عاوية.. والجيش نصه راح بالزلك.. محتاجيك حيل.

آني صفنت.. إتذكرت أيام الطفوله.. مِن چنت ألعب دعابل بروسيا ويه إبن الوزير.

گتله والله عمو... إبطن عيني.. هسه بس أفوّل المولده التايگر للبيت.. وأجيكم
والله ترست المولدة.. وچيـّـكت الدهن.. وأخذت البايسكل مالتي.. ذبيته (d).. وقبـّـطت سكليتر.. وين؟؟.. على الخط السريع مال (حله- كربلاء).. ومناك گلت آخذ يمنه علىروسيا... والله نص ساعه اني بنص موسكو.. بس شحچيلكم!!.. باردة ثلج.
شغلت التدفئة مال البايسكل و صعّدت الجامات... والله گلتلهم وين بيت رئيس الجمهوريه؟؟.. گلولي بقطـّاع 20 يم مرطبات (علاوي جرثومه)
وصلت.. دگيت الباب.. طلع أبو مصطفى (إبن الرئيس الروسي إسمه مصطفى لأن مرته من الديوانيه).. خطيه الرجال حالته جانت زفت.. حضنـّي.. وگلي الله جابك.. گتله خير عمو؟؟.. گال هيچ وهيچ السالفه.. والالمان طبوا بينه گول.. گتله عمو.. صدگ چذب.. اني موجود وهيچ يصير!!!
اني رايح.. منا ليومين ان شاء الله تسمع خير
طلعت رحت على ولد أعرفه بروسيا اسمه (قاسم) هذا شقاوه مال بغداد چان وصديقي الروح بالروح.. گتله قسومي هيچ وهيچ الفلم أريد أسلحه.. گلي تدلل شتريد؟؟.. گتله اريد 65 صاروخ (أرض- أرض)..... و34 صاروخ (أرض- مي) اقصد (ارض- جو)..... و 89بي كي سي..... و فد 6784 رمانه يدويه...... و54564 لغم منوع بين مضاد للبشر ومضاد للدبابات
والله حطلياهن بعلاگه.. اخذتهن وعدل وگٍبل للجبهه.. وين؟؟.. بالخطوط الأماميه... ما اجذّب عليكم الوضعيه صدگ چانت داچـّه (يعني تعبانه).. بس اني اخوكم خوما اخاف!!.. لا يابه لا... گلتلهم للجنود انتوا لمـّوا چوالاتكم ورجعوا للبيوتكم.. مالكم علاقه.. السالفه يمي صارت
باوعت يمنه.. يسره.. شحچيلكم بلـ (564674534جندي ألماني).. وكل واحد راكب دبابة منفيست حديث.. بس اني تعرفوني سبع.
نصبّت الصواريخ على چتفي وصيـّحت...اني إلكم.. طبا طبا.. طاخ طاخ طاخ.. الزگه.. جيبه.. ودي.. الله.. إصلخه.. ألطمه (هاي موسيقه تصويريه).
والله صفيتهم بقوا بس 7 جنود ودبابتين واني باقيلي رمانه وعلچ أبو السهم...... شسويت؟.. لزگت العلچ أبو السهم بالرمانه وشمرتها على الدبابة.. لزگت بيها.. وچان تنفجر.
بقت دبابة وحدة.. ركضت عليها وبيدي قلم أبو النبالات (لحد يگولي منين جبته.. هوه إجه)... والله وبالقلم گطعت السرفه (التايرات مال الدبابه يعني).. وگفت... گـُمزت عالقمارة.. فتحت الباب.. نزّلتهم بيدي.. واخذتهم أسرى.
طبعا وره ما هيچ سويت.. إجه الرئيس الروسي وباسني من راسي وگلي:.. وليدي انته اقوه من گرندايزر والله..

گتله:.. لا عمو ما سويت شي آني.. عادي.. وانطاني هديه سيارة لادا بعدها ما ماشيه بالچيس.. واشترولي بنطرون كتان أصلي من الصين درجة أولى.. وبوتين أديداس أبو العلامة.
رجعت للبيت.. وشغلت المولدة.. وگعدت اتفرج (عدنان ولينا)

موضوع: رد: أبد مو چذاب السبت فبراير 21, 2009 7:35 am

لطيــــــــــــــــــــــــــــــــــــف ابد مايعرف الكذب بس بنقطه وحده لان اعتقد بوقتها ماكو بلي ستيشن2 بس 1.....والباقي كله صحيح....خاصه وان الوضع كان عاوي بوقتها

موضوع: رد: أبد مو چذاب الأحد فبراير 22, 2009 1:55 am

ههههههههههههههههههه ابد ما يجذب
اضحك الله سنك وسعت صدورنا
شوووووووكرن ولا عدمناك

موضوع: رد: أبد مو چذاب الأحد فبراير 22, 2009 9:57 pm

طبا طبا.. طاخ طاخ طاخ.. الزگه.. جيبه.. ودي.. الله.. إصلخه.. ألطمه

ههههههههههههههههههههههههههه اجمل شي الموسيقى التصويرية

قصة لطيفة وتأريخ واقعي لأحداث غير واقعية

شكرا اخي الوعد الصادق

ههههههههههههههههههه

شكرا اخي على القصة الجميلة

صراحة صدك مو جذاب هههههههههههه

نسالكم الدعاء

تحياتي

موضوع: رد: أبد مو چذاب السبت فبراير 28, 2009 11:15 am

هههههههههههههههههههههه
يابويه تعال ليه
جميل جدا بس البايسكل ماتك بعدها موجوده

موضوع: رد: أبد مو چذاب الأحد مارس 08, 2009 5:23 pm

هههههههههههههههههه
لا ابد وينك وين الجذب حتى بأدق التفاصيل ما جذب
تشكرأأأأأأأأأأأأأأأأتي لكـ

مشرف المشاركات : 297 تاريخ التسجيل : 06/02/2009

ههههههههههههههههههه لا منو يقول جذاب

مروركم اسعدني حبايبي الله لا يحرمنا هالطلة الحلوة

لالالالالالالا لحد يحط بذمته ويقول هل قصه جذب هذي قمه الحقيقه واكثر شي صدقته من صعد على قمارة الدبابه ليش الها قماره وتايرات الدبابه lol!

هههههههههههههههههههههههههههههههه اجمل شي الموسيقى التصويرية
قصه جميله جداااا والله ضحكت من قلب الله لايحرمنه من مواضيعك الحلوه

مشرف المشاركات : 297 تاريخ التسجيل : 06/02/2009

والله على راسي اي ويني ووين الجذب ههههههههههههههههههه
دوم الضحكة يارب
الحلو مرورك اخي دمعة الم
لك مني ارق تحية